वीरगञ्ज, २५ फागुन । श्रीमतीको हत्या गरी विदेश भागेका एक व्यक्तिलाई पक्राउ गरिएको छ ।
हत्या पश्चात ६ वर्षदेखि कतारमा बसिरहेका सिरहाको विष्णुपुर गाउँपालिका वडा नम्बर ५ लक्ष्मीपुर निवासी ४१ वर्षीय विक्की मुस्कान भन्ने भोगेन्द्र प्रसाद यादवलाई पक्राउ गरिएको हो ।
इन्टरपोलबाट रेड नोटिस जारी भएका यादवलाई कतारबाट पक्राउ गरी सोमबार नेपाल ल्याइएको प्रहरीले जनाएको छ ।
वि.स. २०७२ वैशाख १५ गते बिहान ललितपुर लेलेमा यादवकी श्रीमती २५ वर्षीया आरतीको हत्या गरिएको अवस्थामा शव फेला परेको थियो।
अनुसन्धाको क्रममा यादवले नै श्रीमती आरतीको धारिलो हतियारले घाँटी रेटेर हत्या गरेको खुलेको थियो । यद्दपी त्यो बेलासम्म उनि फरार भइसकेका थिए ।
फरार रहेका उनलाई कतारमा पक्राउ परेपश्चात प्रहरी प्रधान कार्यालय इन्टरपोल शाखाले इन्टरपोल दोहा कतारसँग समन्वय गरी नेपाल ल्याई त्रिभुवन अन्तर्राष्ट्रिय विमानस्थलबाट नियन्त्रणमा लिएको हो ।
घटनापश्चात वैदेशिक रोजगारीको सिलसिलामा कतार गएका भोगेन्द्रविरुद्ध अन्तर्राष्ट्रियस्तरमा खोजतलास एवम् पक्राउको लागि महानगरीय अपराध महाशाखाको अनुरोधमा २०७६ पुस १२ गते इन्टरपोल महासचिवालयबाट डिफ्यूजन तथा पुनः २०७७ साउन १९ गते रेड नोटिस जारी गरिएको थियो ।
यादवलाई थप अनुसन्धान तथा आवश्यक कानुनी कारबाहीका लागि महानगरीय अपराध महाशाखामा बुझाइएको इन्टरपोल शाखाले जनाएको छ ।