प्रहरी हवलदारको हत्यापछि गाउँले विस्थापित

पोखरिया,भारतको सिमावर्ती बलथरमा बलथर थानाका हवलदारको स्थानीयको कुटपिटबाट मृत्यु भएपछि भारतीय प्रहरीले सयौं गाउँलेहरुमाथि ज्यान मार्ने उद्योगमा मुद्दा दर्ता गरेपछि गाउँका अधिकांश बासिन्दा गाउँ छोडर भागेका छन । गाउँका अधिकांश पुरुषहरु घर छोडेर फरार भएका कारण बलथर र आर्यानगर गाउँमा यतिबेला सनाटा छाएको छ ।

गाउँमा महिला, बालबालिका र वृद्धवृद्धाहरुमात्रै रहेको र अन्य सबै फरार रहेको स्थानीयले बताएका छन । घटनापछि गाउँमा ठूलो संख्यामा प्रहरी परिचालन गरिएको छ ।

गत साता होलीको दिन एकजना स्थानीयको कुटपिटबाट मृत्यु भएपछि आक्रोसित स्थानीयले बलथर थानका हवल्दारको पनि कुटपिट गरी हत्या गरेका थिए । होलीको दिन डिजे बजाएको निहुँमा आर्यानगर गाँउका अनुरुद यादवलाई भारतीय प्रहरीले पक्राउ गरी बलथर थानामा राखेको र उनको थानामा नै मृत्यु भएको थियो । प्रहरीले कुटपिट गरी हत्या गरेको भन्दै आक्रोशित स्थानीयले बलथर थानामा तोडफोड र आगजनी गर्नुको साथै हवलदार रामजतन रायलाई कुटपिट गर्दा उनको पनि मृत्यु भएको थियो ।

प्रहरीले भने अनुरुदको कालगतिले मृत्यु भएको तर स्थानीयले प्रहरीले हत्या गरेको भन्दै थानामा अक्रमण गरी प्रहरी हवलदारको हत्या गरेको बताएको छ ।